鐵人也有倒下時！湖人上場作客丹佛被金塊盡情羞辱，本以為尋日返回主場面對缺少「姚麥」嘅火箭可大打翻身戰，殊不知「鐵人」高比拜仁第四節拉傷右側腹股溝，被迫提早退下火線，結果湖人缺領袖下潰不成軍，最終以91比101輸波，今季初嘗兩連敗，並讓火箭球星阿利沙取得倒戈勝利。

湖人近期可謂頭頭碰着黑，中鋒加素復出無期，球隊再度失準，可算遇上近年罕有低潮。尋日本應有個翻身機會，皆因對手只係缺少「姚麥」嘅火箭，但後者靠年輕球員仲犀利，老將費沙屢次走失快速嘅布魯克斯，畀佢全場射入五個三分波，攻入最高嘅33分。此外後備兵如蘭特利及大衞安達臣都意外地交出表現，最終火箭贏101比91。

湖人當家射手高比拜仁繼金塊一役後再度低迷，全場20射僅五中入18分，可算係今季以嚟表現最差一仗。

布魯克斯（紅衫）成為火箭新動力。 （美聯社圖片）

放大圖片

高比第4節傷出

但原來高比仔低迷有因，今場佢打到第四節初段就直接返回更衣室，證實再度拉傷右側腹股溝。唔講唔知，原來高比仔自打完黃蜂場波後就受傷，所以佢連續三場帶傷上陣，難怪表現咁差，不過呢位「鐵人」賽後表示自己冇大礙，下場對活塞仍可繼續上陣。

本報綜合報道