本文重點
港人每年消耗九億杯奶茶，政商界都有唔少奶茶「粉絲」，好似全國政協委員容永祺及自由黨區議員「哪吒」方國珊，最近都慕名入元朗幫襯勇奪首屆「金茶王大獎」嘅大發餐廳，試吓呢杯「隱世」絲襪奶茶有幾架勢，一試果然香濃嫩滑，讚不絕口，容永祺仲由飲下午茶飲到叫餸食飯變晚餐，認真誇張。
卓妮早前去元朗郊遊，路經洪水橋附近嘅大發餐廳，諗住去飲杯金牌奶茶，點知發現身兼博彩及獎券事務委員會主席嘅容永祺同太太喺度歎下午茶，飲奶茶之餘仲食咗個豬扒包，點知一食就停唔到口，喺餐廳老闆彭敬威介紹下，再點幾味招牌菜，包括龍蝦伊麵、炸生蠔、炸白飯魚同揚州炒飯。
估唔到有龍蝦食
美食當前，容永祺兩公婆愈食愈滋味，想唔到下午茶餐竟變成一頓豐富晚餐。容永祺話，估唔到喺茶餐廳都有龍蝦食，食咗咁多，惟有速速到會所游水，瘦身去也。
「哪吒」方國珊早前亦曾慕名去幫襯「隱世奶茶王」，飲奶茶兼為茶餐廳打氣。哪吒話，現時中小企經營艱難，好似大發餐廳呢類發迹個案少之又少，所以政府要想辦法刺激市道，茶餐廳才有生存空間。問哪吒會否去試吓亦有攞獎嘅六十八元一杯奶茶，佢就嫌貴得滯，話茶餐廳價錢大眾化會好啲喎。
卓妮