全球反恐氣氛稍稍緩和，但個人私隱就蕩然無存。英國機場近日宣布試用Ｘ光全身掃描機，勁到連旅客有冇隆胸或裝義肢都一清二楚。不過香港嘅行會成員及議員就大叫咪搞，話寧願唔去英國；行會成員夏佳理（Ron）更大爆曾畀德國海關除剩底褲搜身，尷尬到極。
煲呔曾尋日現身立法會宣讀悶蛋施政報告，一眾行會成員及議員被迫一早去聽書。卓妮撩大家講吓搜身經驗，個個即時醒神晒。阿Ron自爆有多次被搜身經歷，分別畀香港、德國及美國海關搜過身，最激嗰次係八十年代去德國公幹，無端畀海關請佢入房除晒衫搜身，剩番一條底橫。何解咁緊張？原來當年德國嘅恐怖活動相當活躍，可能阿Ron嘅中印混血兒面孔分外惹人注目啩。不過今次英國引入無所遁形式Ｘ光機，佢話唔抗拒，笑言去嗰度搵番份工做都唔錯噃！
梁君彥剪紙送同僚
施政報告開讀前，經濟動力嘅梁君彥（Andrew）一於攞啲剪紙公仔出嚟送畀議員調和吓沉悶氣氛，睇真啲，原來係行會召集人梁振英（CY）、立法會議員葉劉淑儀及余若薇個樣。身為職業訓練局主席嘅梁君彥話，早前佢出席職訓局旗下嘅中華廚藝學院活動，遇見一位剪紙大師，於是叫對方整啲剪紙畀議員朋友喎。葉太同CY見到張剪紙咁神似，開心到好似執到寶咁，仲叫卓妮評吓分添。
CY怕咗英國Ｘ光機
講番搜身話題，CY話咁耐以來都未試過，更加唔想畀人「照通晒」搜身，話寧願揀用人手搜身好過。做過保安局局長嘅葉太都對英國部Ｘ光機表示反感：「嘩！使唔使咁搜法，以後唔去英國囉。」
一部Ｘ光機可以掀起議員咁多討論，相比之下煲呔曾份施政報告就了無新意，聽到班高官同議員瞌晒眼瞓，好打得嘅發展局局長林鄭月娥、財經事務及庫務局局長陳家強等高官都不敵睡魔急Call，瞌咗幾分鐘，反而早兩日深入菜園村嘅運輸及房屋局局長鄭汝樺仲頂得住；行會成員查史美倫就不時低頭玩手機；石禮謙及李國寶議員久唔久閉目養神。總之人人悶到發慌，份施政報告值幾多分？心照喇！
卓妮