外號「五散人」嘅五名獨立功能組別議員日前開會，除咗講吓點樣加強合作之外，原來亦有就甘威事件進行非正式交流，不過佢哋唔係討論甘威有冇誠信問題或立法會應唔應該調查事件，而係研究點樣避免同類事件會發生喺自己身上！
I.T.豪錄低傾偈內容
其中資訊科技界嘅譚偉豪（I.T.豪）指出，甘威事件發生後，今後佢同幾位女助理單獨傾偈，都係錄定音穩陣啲。醫學界嘅梁家騮擔心，眾所周知佢仲係「鑽石王老五」，傳出緋聞機會特別大。
大輝自爆傾慕對象
保險界陳健波更加慨嘆，就算佢炒晒班女助理改請男人，同樣有機會畀人傳佢有第二樣喜好，分分鐘仲大鑊過向女助理示愛，真係點避都避唔到。佢個女助理事後就特別向佢聲明，話對佢冇乜好感，相信佢辦公室一定唔會發生呢啲嘢，希望波哥唔好因為要避嫌而炒佢。
不過出名口花花嘅廠商會立法會議員林大輝，就認為純粹向女士「表示傾慕」並唔係罪，只要唔涉及鹹豬手或真正嘅越軌不忠，其他人就唔應該說三道四。例如佢近幾年就極度傾慕女歌手孫燕姿，覺得孫好清純同有智慧，屋企收藏咗過百張孫嘅相，每次開演唱會都有捧場，仲次次都坐最前排博握手，晚晚都要聽過孫啲歌先至瞓得着，但咁樣唔代表佢對孫心懷不軌。
問佢太太有冇因而呷醋，大輝就話：「佢夠傾慕張信哲喇！」仲試過要佢使橫手拉關係，混入後台搵張信哲合照。大輝強調唔會因為今次事件而收吓把口，會繼續向啲女助理同女記者「表示好感」，「讚你一句就使死你，點會有人誤會？」對於甘威被指喺事件中講大話出現誠信問題，大輝亦不以為然：「啲高官夠成日講大話喇，日日都話經濟復甦！」
觀塘區議會主席陳振彬透露，佢啲公司職員曾經出現過類似問題，佢嘅處理原則好簡單，如果涉及「夾硬嚟」嘅，就應該報警處理，如果係你情我願嘅，就請佢哋自己拆掂佢，最緊要唔好影響公司工作。佢認為從已知嘅證據嚟睇，甘威事件只係一件私事，唔需要浪費公帑進行調查喎。
卓妮