本文重點
教育局前日宣布調高幼稚園學費減免上限，低收入家庭扣除學券資助後等於免學費，總算係一項德政。卓妮尋日就喺香港會所遇到局長孫明揚，佢笑笑口謙稱：「乜嘢德政吖，做嘢啫！」再問佢有無可能提供幼稚園免費教育，點知孫公話：「有啲幼稚園學費成萬幾銀一個月，點樣免費呀？現時學券制已經幫到大部分家庭。」
楊哲安呻無得湊女
講到學券資助，孫公就申報利益，話自己兩個外孫都有享用幼稚園學券，但就托賴未需要申請減免學費。孫公做局長薪高糧準，女兒同女婿入息都唔差得去邊，就算申請都唔使旨意過到入息審查。尋日除咗孫公現身外，仲有副局長陳維安、助理楊哲安（Jeremy）及常秘黃鴻超，原來四人齊齊為已卸任嘅前考評局主席顧爾言餞行。
Jeremy今年初榮升爸爸，經常公開分享湊女經，卓妮於是嗌佢一聲「湊仔公」，但佢大吐苦水，話屋企個個爭住湊佢個女，搞到佢無得湊喎！Jeremy最近抽中籤成為政治助理召集人，但究竟召集乜嘢就無人知。他解釋，召集人負責收發電郵及聯絡各個政助，另外兩星期安排一次聚會，希望增強局與局之間嘅溝通和協調。
卓妮