浸會大學尋日頒發榮譽大學院士，順便搞埋開學禮，來自米業世家嘅著名建築師呂元祥及婦協主席林貝聿嘉齊獲殊榮。呂元祥家族總動員出動撐場，數最矚目成員，係貴為新地副主席郭炳江千金嘅新抱仔郭曉妍，Noelle尋日腹大便便，睇嚟好快榮升媽咪，呂元祥抱孫在即，可謂雙喜臨門！
林貝聿嘉樂收院士袍
呂元祥太太、八十九歲媽媽、外母、公子呂慶耀、千金呂慶欣尋日紛紛到賀，呂元祥話，難得媽媽及外母年紀咁大都嚟恭賀，非常感動。不過講起新抱仔Noelle有喜，佢就不願多談，話郭氏家族喜歡低調，叫我哋放新抱仔一馬，不過現場所見，Noelle尋日穿着鬆身孕婦裝，腹部明顯隆起，一睇就知，腹中寶貝就快出世了。其實Noelle同老公結婚兩年幾，有喜一啲都唔奇，認真恭喜，恭喜！
另一位獲頒殊榮嘅林太高朋滿座撐場，婦協一班闊太包括高靜芝、唐媽媽、李曾超群及全國人大常委范徐麗泰等組成「姐妹團」到賀，林太千金林詠榆醫生買定束鮮花送畀媽媽，女婿梁守信醫生都放下診所工作抽空捧外母場。林太笑到四萬咁口話，今次係人生中首次獲頒榮譽院士，聽見浸大答應送埋件榮譽院士袍畀佢，興奮到好似執到寶！
卓妮