唔少香港市民都有喺電視睇過、甚至親身落場跑過馬拉松或半馬拉松賽，一般都會喺啲公路上起步同進行，到臨尾先至進入運動場跑多個圈作最後衝線，不過今次東亞運動會嘅半馬拉松賽，就好罕有咁安排咗喺早前爆出豆腐渣工程疑雲嘅將軍澳運動場起步，然後走出場外嘅一段馬路，好似啲小學生玩擲豆袋咁，前後來回兜圈跑足八次，最後再翻兜番入運動場兜多個圈衝線。

運動員恐影響表現

一直關注東亞運籌備工作嘅立法會議員陳淑莊（Tanya），就直斥有關安排係國際笑話，話啲選手肯定轉彎轉到頭暈，影響比賽表現，如果因而受傷，香港就更加孭唔起。佢唔明白大會點解會咁樣安排，唯一解釋係當局規劃失當，晨早定咗喺將軍澳運動場作賽，之後發覺當地一封路就會引發大塞車，最後鬧出天大笑話。

將會參加有關賽事嘅香港半馬拉松及十五公里跑紀錄保持者陳家豪，尋日向我哋證實有關安排。佢話今次場地同以往不同，多咗U Turn轉彎位，佢要考慮喺彎位如何減速，將影響減到最低，惟有預早喺下月去現場訓練同熟習環境。佢又有啲阿Ｑ話，由於比賽集中喺同一段路來回進行，希望到時啲市民喺沿途打氣都會集中啲，比賽氣氛熱烈啲喇！

我哋就此問過東亞運公司，對方話有關路線係經該公司同政府部門多次磋商後決定，並得到香港業餘田徑總會認可，又強調國際長跑例冇規定賽道唔可以兜圈或最多只可兜幾多個圈，唔會影響跑手表現，但就冇解釋點解作出咁荒謬安排。我哋之後再追問田總，田總叫我哋問番東亞運公司。東亞運籌委會主席霍震霆更加好似完全唔知情。總之大家互相推卸，冇人夠膽企出嚟孭鑊解畫。