本文重點
自由黨前主席田北俊同太太Mary出名係政壇模範夫妻，人前人後都咁恩愛。田太前日現身中環置地廣場ThreeSixty超市，喺糕餅櫃旁左挑右揀，田太陪田少遊完西藏返港，感冒仲未好，咁快忍唔到口食甜品？原來佢係做廿四孝老婆，抱病都嚟為田少揀選心愛嘅朱古力鬆餅。
田太早前陪田少參加自由黨西藏團，喺火車車廂感染傷風，一直未好，前日中午遇見卓妮嘅時候，啱啱睇完中醫，不過無即刻返山頂屋企休息，反而趕去ThreeSixty，買咗裸麥麵包同朱古力鬆餅，原來後者係田少嘅至愛。卓妮見田太攞住環保袋，問佢有乜好嘢煮畀田少食？田太謙稱自己係「無飯煮婦」，落廚非佢強項，不過總有幾味撒手鐧嘅。
田少後生時追瘦田太，終於抱得美人歸，邊捨得田太操勞揸鑊鏟吖，反而田少最近傳出重返自由黨幫手，以後可能又少咗時間陪老婆就真。田太就話，從來唔過問田少嘅事，對佢從政一直都無意見。其實唔反對就即係支持喇。
田少鍾情法國紅酒
講開田少，卓妮日前遇到佢同細佬田北辰喺中國會食晏，話題由中國會品酒師鄭國偉獲選為本年度最佳法國葡萄酒品酒師講起，田少就話，佢只係鍾情法國紅酒，原因係佢八十年代開始接觸紅酒時，香港只有法國品種入口，飲開有感情，依家新興嘅紅酒國家，好似智利、阿根廷、美國及南非嘅紅酒，佢試都唔會試。佢好謙話自己嘅味蕾一定唔及品酒師，不過佢飲來飲去都只係幾個酒莊嘅法國酒，所以唔使試新嘢。
田少曾喺九○年大手購入幾千支紅酒，四年前孫仔出世時又即興再入多一批，據聞有多瓶是他一九四七年出生年份嘅紅酒。田少話，佢啲酒部分儲存喺英國，部分喺山頂豪宅嘅地下酒窖，佢唔願透露藏數，估計珍藏深不可測。田少曾經講過，最喜歡嘅四七年紅酒係Chateau Cheval Blanc，產自世界名莊Saint Emilion，物以罕為貴，現時身價可能貴到嚇親人。
卓妮