中環出更:王銳強 鬍鬚曾疑扯貓尾

由財政司司長曾俊華(鬍鬚曾)一手催生嘅長遠財政計劃工作小組,推算香港最快七年後出現結構性財赤,但鬍鬚曾同時叫停開徵銷售稅(GST)嘅討論,話香港要維持低稅率環境。不過,去年由鬍鬚曾親自招攬埋班、加入工作小組嘅王銳強,尋日就以羅兵咸永道會計師事務所高級顧問身份,落足嘴頭推銷GST,究竟佢係同鬍鬚曾大唱反調吖?抑或係幫鬍鬚曾試水溫呢?

王唱反調 倡開徵銷售稅

王銳強尋日就財政預算案舉行工作坊,話香港稅基狹窄,過去一直太過倚賴利得稅等直接稅收,又話全球已經有一百五十多個國家及地區以唔同方法實施GST,鄰近嘅馬來西亞亦計劃明年開徵百分之六嘅GST,似乎香港唔跟就走寶。講到咁好,點解政府唔再就GST諮詢公眾呢?王銳強話,考慮到香港目前財政狀況健康,加上預期公眾都唔會接受建議,所以一動不如一靜喎。

咁就奇喇,鬍鬚曾過去一直同工作小組「唱雙簧」預言香港財政岌岌可危,輪住警告香港要開徵新稅項,但講到GST就存在分歧,究竟香港何去何從呢?香港長期議而不決、決而不行,連係咪再就GST諮詢公眾都畏首畏尾,難怪開徵GST多年嘅新加坡,今年競爭力已超越香港啦!

卓妮

第一手消息請下載on.cc東網iPhone/iPad/Android/Windows Phone Apps