卓妮尋日在寧波優質農產品推介會上遇到裕華國貨董事副總經理余鵬春，問起中環裕華結業，佢就話並非因為市道差，而係因為德輔道中嘅客源不足，而且舖位樓底太高，裝咗射燈都照射唔到啲貨品喎！

射燈太高照唔到貨品

余鵬春無奈話，經營百貨業要好大地方，雖然德輔道中舊金城銀行個舖位夠晒大，但就唔適合經營百貨公司，事關樓底太高令射燈照射唔到啲貨品，所以租咗三年就決定唔再續約嘞。

至於點解租舖時無發覺樓底高，余鵬春無詳加解釋，只係話以前租用皇后大道中舊龍子行個舖位，客源啱裕華多啲，所以一租就六年，其後因重建計劃而搬遷。

卓妮記得二○○○年裕華在舊龍子行舖位開業，城中富豪名人拱照開幕酒會。裕華在舊龍子行六年期間，經歷過金融風暴後沙士爆發嘅最艱難時期，仍然屹立不倒，證明無揀錯舖位，所以余鵬春話會睇實將來發展，有機會一定會捲土重來在皇后大道中搵間舖位重新開業。

卓妮