雖然一班港區全國人大仲喺山西考察，但身兼古物諮詢委員會主席嘅Bernard陳智思，尋日已離隊返嚟，預備今日委員會開會工作。喺山西幾日，Bernard去咗五台山、平遙古城同常家莊園等山西必到景點。Bernard話，未去山西前，都唔知山西有咁多嘢睇，今次都算開咗眼界，尤其係常家莊園，呢座中國民間最大嘅私家莊園，令佢目不暇給；而被列入《世界文化遺產名錄》嘅五台山，又充滿濃厚嘅歷史氣息，啱晒佢呢啲接觸開古物嘅人。不過啲景點靚還靚，Bernard覺得仲有美中不足之處。
何解？佢話依家內地好多旅遊設施都太商業化，整體畀人嘅感覺「低檔」咗喎，具體如何低檔法，佢就冇乜詳細講喇。不過Bernard話香港人喺包裝方面做得幾好，所以不妨多啲返內地，幫手諗吓點樣將啲景點再包裝，提升番整體質素。雖然Bernard唔保證呢門生意有錢賺，但依家香港失業率咁高，都算係一條出路嘅。