政情：選超級議席Paul提騎呢修訂
行政長官及立法會選舉（修訂）條例草案下周三恢復二讀及三讀表決，預計各黨派就新增「超級議席」參選資格，將展開一場激辯。立法會旅遊界議員謝偉俊（Paul）前日趕喺提修訂限期前，入紙提出修訂，佢嘅修訂相當騎呢，就係限制「三高」人士出選超級區議會議席，即身高超過五呎四吋、學歷超過高中水平、月薪高於一萬蚊嘅人士，全部應該同超級議席講拜拜。喺現任議員入面，公民黨睇怕係唯一一個三個條件都唔符合嘅政黨，阿Paul一直同公民黨有唔少牙齒印，莫非搞死公民黨？
阿Paul尋日同我哋講，呢個修訂無意針對任何人，只係想藉此引起各黨反思，說服其他人支持取消超級議席嘅選舉開支上限。到底阿Paul嘅思路係點呢？佢解釋話，好多人反對取消選舉開支上限，覺得係益咗商界參選，但佢認為呢個諗法係將金錢當成罪惡，唔恰當。阿Paul覺得選舉中唔止有錢人有優勢，高大英俊嘅、學歷高嘅都會吸引到人投票支持，所以如果選舉要設金錢限制，連學歷同身高都應該限制埋先公平喎。
自己都唔支持 預咗必敗
不過加入咁多限制，驚唔驚被質疑歧視先？阿Paul就話今次只係想引發討論，佢自己都唔會支持呢個修訂，希望大家唔好覺得佢搞事。有成班大狀坐鎮嘅公民黨都話，唔覺得阿Paul玩針對，但就斬釘截鐵話，阿Paul提出嘅條件有違《人權法》，又強調立法過程應該嚴肅，絕對唔贊成阿Paul搞呢啲曲線修訂喎。
雖然阿Paul本住必輸心態提出修訂，不過佢就可能連「輸」都無機會經歷，事關立法會主席好大機會唔批准呢個修訂。根據政府建議，只有現任區議員先有資格參選超級議席，但區議員本身月薪已經有兩萬幾蚊，如果再限制只有月薪一萬蚊以下嘅人先可參選，兩個條件根本自相矛盾。睇嚟阿Paul嘅修訂都係凍過水嘞。