陳健波有位朋友認識一位夏威夷大學教授，佢係一位業餘天文學家，近日計算出武漢荊州荊門市劉集村係最佳觀賞日全食嘅地點，於是發起日全食觀賞團，陳健波一家於是參加埋一分。陳健波話，據講劉集村真係三國時代劉備聚集過嘅地方，四周都係荒蕪田野，在窮鄉僻壤安裝大批攝錄器材，吸引咗數十名村民圍觀。

陳健波在武漢	謝偉俊在黃山	林超英在香港

荊州村民拖動物同觀賞

當村民獲悉出現日全食後，立即拖晒屋企所有禽畜到現場，話要睇吓民間流傳嘅「天狗食日」令禽畜有乜反應喎，真係有科學精神。陳健波見班村民咁高興，就將用剩嘅太陽眼鏡派畀村民分甘同味。當日全食到達「食甚」時，天色恍如傍晚時分，顯得紫紫藍藍，大家都興奮得「嘩嘩」聲。當時陳健波留意到，牛隻停止食草，抬頭周圍望，雞隻就咯咯聲周圍走，反而豬隻最懶，話之個天冧落嚟。

陳健波話，今次與太太和兒子一齊觀賞日全食之餘，仲有一班村民贈興，可以講係奇妙之旅。至於阿Paul同太太白姐姐就參加咗香港入境團旅行社協會舉辦嘅「黃山、杭州、千島湖考察團」，兩人在黃山山腳酒店門外安裝攝錄機拍攝日全食，結果拍得好有水準。阿Paul兩公婆同陳健波一樣，發現附近嘅昆蟲和動物對日全食有異樣，阿Paul留意到百鳥歸巢之象，而白姐姐就話見到有青蛙同昆蟲跳出嚟，十足拍戲一樣。

如果唔想去到內地咁遠，香港都有得睇，但只能觀賞日偏食，卓妮就發現綽號「黑英」嘅前天文台台長林超英去咗紅磡海濱長廊觀賞日偏食，咪以為黑英會好專業咁帶齊「架生」去睇，其實佢只係帶咗老婆送畀佢嘅自製針孔相機。針孔相機由一個鞋盒改裝，一邊開個窿，另一邊紙皮就用牛油紙取代，使用時將針孔一邊對正太陽，然後就可以在牛油紙上觀看日食，黑英話呢個方法又平又安全，保證不會傷眼喎！

黑英觀賞日偏食時，又發現「日暈」太陽折射現象，即時通知以前天文台同事多加留意，睇嚟佢依家都係心繫天文台！