新一代「公職王」張震遠（Barry）近期頻頻出鏡，皆因除咗大家比較熟悉嘅市區重建局主席外，佢依家仲身兼埋影響十六萬公務員「錢」途嘅薪酬趨勢調查委員會替任主席。Barry喺經濟金融範疇同樣活躍，搞咗成年嘅商品交易所即將上馬，佢正係委員會主席。尋日Barry獲美商會邀請，以市區重建為題作午餐演講，會後畀記者追住嚟問，左一條市建局、右一條商交所，難得佢笑笑口企定定逐條答晒，相當唔話得！
答到咁上下，Barry忽然拍一拍身旁一位非常高大嘅後生仔心口話：「下次訪問吓佢吖！」不過當時記者們掛住抄寫，無人留意到呢位後生仔，事後問番先知道原來個後生仔係Barry嘅公子。Barry係山東人，本身已高大魁梧，但佢囝囝仲厲害，睇落有六呎二吋咁高，足足高爸爸大半個頭！
Barry尋晚臨飛去紐約同倫敦開會前，都回覆我哋嘅「追魂call」。原來佢個牛高馬大嘅囝囝今年得十九歲，個中文名仲好特別，叫張緒仁，依家喺美國加州Claremont Mckenna College讀緊大學一年級，最近返咗嚟過暑假。佢就讀嗰間係美國著名嘅文理學院，為商界、公共行政及政治界出產唔少領袖。今次Barry帶囝囝出嚟見世面，莫非準備為佢呢個「公職王」培養接班人？