政情：沈祖堯原係熟手「執仔公」
被喻為「沙士英雄」嘅中大校長沈祖堯，尋日喺醫學博物館一個關於助產士服務發展展覽講起當年喺港大醫學院讀醫嘅經歷，最難忘喺贊育醫院實習當「執仔公」。話說沈祖堯喺港大醫學院讀第四年時，有八星期去贊育醫院做實習，幫手替產婦接生，喺佢眼中呢八星期係佢讀醫生涯中最似醫生嘅時間。當時有助產士同佢講：「個媽咪係負責生，你係負責接住。」呢個溫馨提點，佢一直記住。
佢記得當時喺醫院住，如果要幫手接生，實習生要即call即到，沈祖堯有一晚試過一晚之內幫手接生七個BB。又試過有產婦生完後向佢連聲多謝，相反只係對幫佢接生嘅女醫生講：「唔該呀，姑娘﹗」
沈祖堯話試過有一次為水上人產婦接生第五胎，BB個頭雖然出咗嚟，但個身「kick」住咗，最後㩒住BB鎖骨先至整個人出咗嚟，稍有差池BB同媽媽都有生命危險。雖然「執仔」咁有經驗，但沈祖堯自己個女出生時，緊張到跌晒啲手術架生落地喎，所以佢只係選擇喺老婆身邊默默打氣。