恒生銀行副董事長兼行政總裁梁高美懿正式上任咗幾日，與前大班柯清輝交接順利，前日就見佢一身深色行政套裝，坐住柯大班部車牌「353」嘅舊凌志去香港會所食晏。梁太現時貴為恒生一姐，衣着簡單樸素偏向老成，由着衫至坐車，各個方面都似乎要確立一個實幹唔花巧嘅形象。
問梁太係咪接收咗柯大班部車用？梁太就話柯大班用開嘅不僅呢部車，事關恒生提供好多座駕畀高層用，所以部凌志只係其中一部。至於座駕車牌號碼為「353」，係咪有特別意思？梁太就話唔多清楚，只係知道好多部高層座駕車牌都係無英文字母嘅！
梁太上場當日，恒生股價突破一百元水平，而且又獲摩通調高目標價到一百零八元，變相好似慶賀梁太上任，而股價呢幾日都穩住喺一百零二元至一百零三元水平，更高見一百零六元，直頭好似將好運由滙豐帶到去恒生一樣。