本文重點
騎士又創歷史！今季達巔峰的克利夫蘭騎士，於東岸四強戰第四回合作客亞特蘭大鷹隊，以84比74贏波，總比數四比○淘汰對手打入東岸決賽，繼首輪橫掃底特律活塞後再下一城。兩次「4:0」顯示騎士弗到爆，最厲害嘅係，騎士呢八場全場贏對手雙位數字，勒邦占士更係場場得分都係「25+」，賽後佢再次公開下戰書，話球隊係為總冠軍而戰，睇嚟呢句衝住湖人同高比拜仁而嚟！
睇得呢段文，相信球迷早已知道騎士四比○喪爆鷹隊，戰果已經唔重要，阿Bob不如同大家睇睇一啲賽後反應同數據仲好。先講勒邦占士，呢名常規賽ＭＶＰ繼續交出ＭＶＰ應有表現，今仗射入27分，keep住喺呢個系列賽每場都係兩隊得分最高嘅球員，而佢喺對鷹隊四場出場時間151分鐘，累積射入135分，平均每67秒就入１分，認真厲害。而騎士呢個系列八場賽事每場贏對手雙位數，球隊狀態簡直到達頂峰。
直落８仗贏對手雙位數
不過，占士賽後就話，其實無乜嘢值得慶祝：「晉級就係晉級，無論係第四場定係第七場，我哋係要攞總冠軍，唔需要特別慶祝。」講就講得有型，但小心陰溝裏翻船，雖然騎士成為自一九八四年開始取消常規賽戰績最好四隊自動入季後賽次圈嘅賽制以嚟，第六支取得兩輪「零敗仗」嘅球隊，更前無古人咁每場都贏對手10分以上，但之前五支球隊當中，只有89年的活塞及93年的芝加哥公牛可以贏得總冠軍，相信「大帝」同騎士眾將仍要保持勝不驕作戰心態。