中國古語有云：「發財立品！」但一場金融海嘯就令大家睇到部分商界「精英」為咗賺錢可以幾無品都有。啱啱喺三月底由城市大學回巢返浸會大學做工商管理學院院長嘅張仁良都好睇唔過眼，佢尋日到任後首次同傳媒見面時就慨嘆，以往商科教育太着重教學生點樣將利益最大化，無去教乜嘢係賺之有道，所以佢上任後就諗住執一執個課程，喺新學年將「企業社會責任」同「商業道德」列做必修課程，鼓勵學生多啲參與社會服務，要佢哋畢業前學識「未發財，先立品」。
學院又撥款六百五十萬元喺未來三年做獎學金，希望以每年最多拎十二萬元嘅銀彈攻勢，吸引本港同內地尖子，唔夠隨時加碼。佢定下目標，五年後令學院喺企業道德方面做到亞太區一哥添！
張仁良尋日就以身作則，向每位記者送上一包由匡智會智障院友親手做嘅曲奇餅做禮物，以行動支持社會企業。佢位法籍太太依家逢星期二、四都會去匡智會位於麥當勞道一號嘅餐廳做義工，幫手洗碗洗碟，兩公婆實行一個出錢、一個出力。不過張仁良轉頭就踢爆太太原來喺屋企十指不沾水，全部交由外傭代勞。咁大膽爆響口，因住返屋企畀太太扭耳仔呀！