魯域斯基情場燒鬚

依家小牛落後緊○比二畀金塊,形勢水深火熱,想出線就要寄望主將魯域斯基大爆發至得!不過呢位「德國槍」最近就煩惱多多,事緣美國聯邦調查局(FBI)日前喺佢位於達拉斯嘅豪宅中拘捕一名被通緝嘅「千面女飛賊」!但原來女賊仲有一個身份,就係魯域斯基嘅女友。咁多女唔溝,偏偏溝正個大賊,魯域斯基呢鋪惟有嘆句遇人不淑啦!

據美國媒體透露,涉案者係一名名叫泰萊嘅三十七歲女子,佢因為犯下偽造身份及盜竊罪後,多番逃避警方追捕而被通緝,結果FBI查出佢身處魯域斯基家中,即時將佢逮捕。警方表示泰萊為咗掩人耳目,曾經用過八個化名生活,係個百分百嘅職業罪犯。

FBI闖魯宅拉人

泰萊被捕時,魯域斯基正隨小牛從丹佛返回達拉斯,所以當時都唔喺屋企,而事發之後亦冇作出解釋。不過NBA電視台報道稱,已證實呢位「千面女飛賊」係魯域斯基女友;而CBS台亦指魯域斯基僱用嘅私家偵探已向警方表示,泰萊確實係魯域斯基女友,但因為後者並唔清楚泰萊底細,驚墮入「桃色陷阱」所以先搵私家偵探查明身份。

雖然泰萊並非索女,本身又犯案纍纍,但情人眼裏出西施,年薪達到一千八百萬美元(約一億四千萬港元)嘅魯域斯基今次可謂「獨具慧眼」!家陣球隊失利,女友又爆出個咁大嘅鑊,「德國司機」真係有排煩矣!

女飛賊小資料

被捕時名稱:泰萊Cristal Taylor

年齡:37歲

涉嫌犯案:

偽造身份、盜竊

■本報綜合報道