牛下邨居民等搬等到死

在牛下邨生活逾四十年的鄧伯，與妻女居於不足二百呎單位，斗室只可放一張床及簡單家具，十五歲的女兒每日朝行晚拆「打地鋪」，生活環境惡劣，一家三口企盼盡早搬遷。

直至去年八月，鄧伯一家終可到房署辦事處辦理揀樓手續，「當時真係好開心，有埋實際地址，以為可以好快入伙。」去年十一月更有消息指最快可於一個月後遷入新居，但卻失望而回；之後多次傳出收樓日期，但卻一改再改，至上月底鄧伯才收到房署通知，於明日可往新居參觀，「只係去睇吓，仲未知幾時可以攞鎖匙。唔明點解唔一次過簽埋約，睇樓、派匙，分幾次做，嘥人手又嘥時間！」

鄧伯一家居住環境十分惡劣，女兒每晚均要席地而睡。	何婆婆：「我今年八十歲，喺度住咗四十幾年，每日要撐兩層樓梯先返到屋企，梗係想快啲搬去新樓，唔使再行樓梯啦！」	卿姐：「啲親戚成日問我幾時搬，我都答唔到，依家已經唔會再信乜嘢預計日期，一日未攞鎖匙，一日都唔知幾時搬得！」
牛頭角上邨第二、三期重建竣工多時，但卻遲遲仍未能入伙。	陳國華指有住戶因家庭成員去世，戶籍出現問題。

戶籍問題添煩亂

除鄧伯一家外，牛下邨亦有不少居民對搬遷無期感焦慮不安，一提起房署安置計劃，住戶徐太更即時眉頭深鎖，「都唔知幾時先搬到，日日坐喺度等，真係等到頸都長埋！」

「我手頭有十幾個家庭，因為在等候期間有家庭成員去世，少咗人又要由頭揀過一間細啲嘅單位，搞到好麻煩！」當區區議員陳國華直言，由於房署對搬遷日期一再拖延，已有不少住戶因家庭成員去世而出現戶籍問題。

拖延入伙藉口多

陳亦指，過往多次傳出收樓日期，但全為無米粥，「（房署）之前就話紮鐵工人罷工，又話地下水管、電纜有問題，最新嘅藉口係天井要執漏，總之就係問題多多！」因應居民的不滿，陳國華不斷向房署查詢，但均無功而還，「牛上邨同附近嘅彩盈邨同期興建，彩盈邨入咗伙已經一年，唔知點解牛上邨咁遲都未入得伙！」

公屋聯會主席王坤直指事件反映房署處事官僚，「做咗咁多次原區安置，已經好有經驗，入伙紙、驗樓呢啲嘢應該一早有晒時間表，冇理由因為咁搞到入唔到伙，真係離譜！」王坤估計事件或因工程進度、裝備等出現問題所致，認為房署應就事件向居民清楚交代，讓居民能作適當預算。

房署發言人並未回應牛上邨入伙日期一再延遲的原因，只稱牛上邨工程雖已竣工，但需較長時間驗樓及等候批出入伙紙，預計五月開始可安排牛下邨居民陸續辦理入伙手續。牛下邨現有約三千戶共七千多居民，將獲原區安置於牛上邨第二、三期的六座公屋大廈。

■記者 梁少儀