「五散人」之一嘅立法會議員林大輝尋日有斬獲，佢隻愛駒「好奇妙」尋日喺快活谷首場跑出，令到今個馬季未拉過頭馬嘅大輝，終嘗拉頭馬滋味，帶挈身為馬會大董嘅太古（中國）主席陳南祿贏錢添！
大輝匹「好奇妙」贏咗二十七萬元馬主獎金，身為馬主嘅佢，起碼有十九萬落袋，難怪大輝心情勁靚，仲話有啲嘢你預咗佢唔得，點知佢又得，世界真係好奇妙，同佢隻愛駒好應景！
至於陳南祿就無咁好彩，佢自己匹「時時有機」喺第二場跑輸咗，惟有寄望下一次；不過佢好有眼光，買中大輝匹「好奇妙」，雖然佢只係買咗十蚊，贏都只係贏四十幾蚊，不過總算有個好意頭吖！
不過令大輝嘅開心事唔止拉頭馬，佢笑笑口話要多謝財爺對佢嘅訴求積極回應。原來大輝去馬場前去咗政府總部，同其他「四散人」見財爺，大輝話，佢叫財爺檢討中小企信貸保證計劃，財爺話會五月底檢討；佢叫財爺盡快研究港府發債，財爺亦話會今個立法年度拎上立法會；佢仲叫財爺擴大自由行城市，財爺又話會睇睇，但咁樣算唔算積極回應，真係見仁見智。