行程緊湊
夜蒲玩樂有酒飲又有女溝，一般愛玩之士可能樂此不疲，但係夜蒲其實都幾累人，唔係累死人個累，而係疲累個累，事關夜蒲一定唔係揀自己屋企樓下，最好就係跨區夜蒲，咁先冇咁易撞到熟人。再者，夜蒲夜蒲，梗係玩到通宵達旦啦！加上又要飲酒，想唔攰都幾難！不過，如果大家怕攰的話，咁就唔可以參加日本最新興起嘅呢個狂野巴士團喇！
呢個巴士團並非一般旅行團，而係專門接載男人四圍去滾嘅短線團！一晚之內遊盡三個東京區內嘅夜蒲熱點，包括淺草、上野以及六本木，玩家全程都會喺一架特大豪華旅遊巴內玩樂，唔需要落車咁浪費時間！實在係行程緊湊，節目一流，點解話佢節目一流呢？因為巴士之內雖然空間有限，但係能夠得到嘅享受卻有三種！
車內盡興
每架巴士最多接載22個團友，每晚六點半於東京鐵塔出發，途經三個地方：淺草、上野、六本木。呢三個都係燈紅酒綠嘅夜蒲熱點，而且各具特色。淺草較為淳樸傳統，當地嘅夜總會小姐亦相當純情可愛；上野嘅夜場相對於淺草則熱情奔放，夜場嘅小姐亦以激情開放為主；而六本木嘅夜場就以豪華見稱，當地嘅夜總會小姐更加係打扮華貴，風情萬種，參加呢個巴士團嘅團友，就可以一次過享受到上述三種小姐嘅特色喇！
巴士空間雖然唔算大，但係都設置咗幾張枱仔，巴士每行經一個地方，當地夜場嘅小姐就會上車陪伴團友，玩法就如同一般嘅夜總會，陪團友把酒談心，感覺絕唔差過直接行入夜總會玩樂！而且座位較為擠迫，就可以提供更多機會畀團友趁機抽水啦！
隨時落車
日本人落去夜總會夜蒲，事必會搵個夜場小姐相伴，不過大家唔好以為佢哋好似北上消費嘅朋友一樣，落到夜場就一定要發洩慾火喎！因為夜場小姐雖然唔算係吊高嚟賣，但係都叫做守身如玉，你唔幫襯番佢哋三幾次，都好難要求佢哋肯畀你帶到酒店作深入了解喇！除非閣下真係大把錢，可以用重金利誘啦！
然而，今次呢個巴士團就比較唔同，因為今次開團嘅宗旨係食快餐，只要團友遇到一位心儀又投契嘅小姐，又能夠將佢哄到心花怒放的話，就可以向小姐提出深入了解嘅要求，若然小姐答應的話，呢餐飽喇！大可以即刻叫司機：「唔該去最近嘅酒店啦！」至於與小姐短敍嘅費用、酒店房租、以及接小姐回程嘅車費，則要由該位心急嘅團友全數支付喇！
收費相宜
呢個巴士團由六點半玩到十一點半先結束，足足有五個鐘，可以享受到三種不同小姐嘅溫香，而且車內嘅酒精類飲品仲係無限制放題，對於夜蒲愛好者簡直就係福音！不過，巴士團咁出色亦唔代表收費高昂喎！每個團友嘅費用只需39,000日圓，即係大概3,100港元左右，相對於正常夜總會消費動輒五六萬日圓便宜上一大截。
巴士團嘅負責人表示：「由於全球經濟不景氣，所以近期可以話係日本娛樂事業嘅最艱難時期，男士們一係為咗慳錢唔去夜場消費，一係就因為工作捱更抵夜冇時間玩。因為咁，我哋就諗出呢種時間短，但係就可以享盡三種溫柔嘅巴士團，而且仲降低收費，希望以又平又慳時間嘅服務增加吸引力。」另外，佢仲表示除咗有專為男士而設嘅巴士團之外，仲有接載女士嘅同類短線團，而上車服務佢哋嘅就梗係舞男啦！
撰文：賢