新一屆立法會特別多各式各樣委員會，由梁展文到雷曼迷債，都成立咗委員會嚟傾，身為立法會秘書長嘅吳文華（Pauline）忙到不可開交。女強人到底有乜減壓方法？答案好簡單：湊孫為樂。
Pauline尋日中午去香港會食飯，講起復活節有乜節目，佢話因為公務繁忙，想去旅行都難，惟有留港消費。不過幾忙都好，一定會留番啲時間畀孫仔，保養得宜嘅Pauline原來已經有三粒孫，分別係兩個孫女同一粒孫仔，年齡介乎二至四歲，正值好玩得意期。Pauline好雀躍咁話，打算復活節期間帶孫仔孫女去迪士尼狂歡，皆因佢哋各自買晒套票，點玩都得；為氹孫仔孫女一笑，Pauline要變埋大細路，認真唔話得！
不過，返到立法會呢個戰場，佢又要變身做硬淨秘書長，事關立法會近期開會火藥味濃，粗口橫飛之餘，仲有雜物周圍掟，睇見呢種場面，身為女流之輩嘅Pauline都要出盡九牛二虎之力拉開班火爆議員，問佢驚唔驚鬥氣場面會殃及池魚、傷及自己？Pauline就好淡定咁話，自己同班議員其實有偈傾，言下之意，班大男人會錫住佢，唔會郁手打女人，Pauline呢招以柔制剛果然有效！