有「理大秋官」之稱嘅校長唐偉章尋日就職上任，除了理大一眾校董會成員及香港多間大專院校校長齊撐場外，仲有幾位神秘嘉賓，佢哋就係唐爸爸、唐媽媽、唐偉章太太Esther以及唐家三子女，湊成一幅幸福家庭照，熱鬧到極！
唐校長雙親原來係長壽耆英，唐爸爸今年八十八歲，唐媽媽就八十一歲。唐父近年中過風，行路要撐住拐杖，但講嘢依然中氣十足，佢話兒子童年志願唔係做校長，而係鍾意砌模型飛機，唐校長細個仲有啲頑皮，不過讀書就好醒，唔使父母操心。
唐太Esther就係校長喺美國讀書時嘅同窗，Esther亦係理科生，同讀機械工程學嘅唐偉章特別啱傾。婚後兩人育有二子一女，大公子Ernest、二女Patricia同細仔Jonathan尋日專程由美國返港賀老竇升官，場面溫馨。
講番唐校長就職，理大破天荒頒咗一條長到落肚臍嘅校徽鏈畀佢，條鏈由四個理大唔同時期嘅校徽組成，由唐校長開始，世世代代傳落去，十足家傳之寶咁。聽講呢個校徽鏈構思喺外國大學好流行，不過香港啲大學就唔多興，尋日有份到賀嘅港大校長徐立之話，佢就冇呢條鏈喎。問佢送乜禮物賀唐校長？徐立之笑言：「我嚟已經好畀面喇，唔使送禮嘅！」果然係講心唔講金。