見到「新舊紅彗星對決」唔使嚇親，日本唔係有高達新戲上映，只係為咗慶祝高達30周年，Bandai響年尾推出宇宙世紀系列兩代高達嘅宿敵——馬沙專用渣古（MS-06S）同Gundam Unicorn新安洲（MSN-06S）。在1:144模型世界大打出手，由外形武裝鬥到裏面骨架關節結構，打得難分難解！
卡通中馬沙專用渣古同新安洲在機設有唔少相似地方，無論駕駛員、武器招式、作戰模式都大同小異。先講高達迷熟悉的渣古，今次「升呢」成RG，使用全新關節骨架構造，例如手腳均用上三重關節，當屈曲時裝甲前後可上下滑動，充滿機械感；肩膀亦有拉出式關節，方便擺出雙手揸槍等拗前動作，唔會因胸口動力管阻礙而減低可動性。
多得新骨架設計，小記覺得RG紅渣古屬歷代渣古中最能反映真實機體甫士，例如凌空飛腿、衝前肩撞這些馬沙常用嘅招式都可以一一使出。最驚喜是渣古使用嘅武器都齊全，基本如電熱斧、渣古機關槍同火箭炮都有。
HGUC版新安洲由於要兼顧獨特的連續曲面設計，大多部件都採用一體成形兼冇接合線。件數雖然減少咗，但胸甲、腰間、手腕同膝蓋仍保留獨有的浮雕，外形表現細緻強悍。不過手關節只採用普通的二重關節，幸好新機雙腿能大幅度張開，仲可打開羽翼推進器，擺甫士型到痹！
由於新安洲係近身戰機種，所以斬擊武器都齊晒，除咗有雙刃光束斧畀大家互劈外，光束特效配件更可以安裝在盾牌上，招牌怒劈同突刺動作終於可原汁原味呈現！不過射擊武器就只有光束來福槍同小型榴彈發射器，冇咗火箭炮小記有啲不滿。
MS-06S馬沙專用渣古係U.C.0079年一年戰爭中的自護名機，其高速作戰模式被冠以「紅彗星」之名，由於推進力比量產型高，更有「三倍速」嘅稱號。售價：$239（RG MS-06S渣古）
HGUC MSN-06S新安洲係U.C.0094年新自護殘黨部隊搶走嘅試作機，紅色機體擁有精神感應技術及強大機動性，所以被稱為「紅色彗星」。而駕駛者弗爾還鍾意戴面罩。售價：$249（HGUC MSN-06S新安洲）
撰文 ：廖俊斌
查詢電話 ：2433 1828