側轉Flipout 9彩扮nano

四方形、篤芒，再襯埋個9彩靚爆外殼，唔好呃叔叔，仲唔係新版nano？唔係喎！事關以上元素再加個側滑QWERTY鍵盤，就係Motorola新機Flipout MB511；型爆9色任你揀，紅、綠、黑、白跟機送，其他就要預訂和換領，十足7仔儲印花換公仔，儲齊一套囡囡實讚你！

2.8吋輕觸式屏幕下方備有設定、首頁及返回3個熱感鍵，係典型Android機配置。

外形似包紙巾

今年Motorola銳意成為Android一哥，單係目前為止就出咗6款新機，加埋剛喺美國CTIA發展嗰5款同今日嘅Flipout，果真兌現了年頭話出夠一打嘅承諾。難得係佢冇濫竽充數，出親都玩創意。好似呢部Flipout咁，就玩四方果外形，體積只有67×67×17mm，同包紙巾差唔多，夠晒的骰可愛。而最令用家開心嘅係跟機除送4色外殼外，預訂仲送藍、黃及粉紅3色，加埋買機後可到豐澤換領木紋及豹紋機殼，總共9隻顏色，一星期日日換款都仲有凸！

一Flip即彈出

四方形加上9彩外殼，個Look的確同iPod nano有幾分似，但講到操控佢就更勝一籌，事關佢不但可玩篤芒，機底還備有QWERTY鍵盤。而開機推出方法亦唔似一般滑蓋，只需用手指公從機側輕輕一Flip，鍵盤便會應聲彈出；最抵讚係QWERTY鍵盤為5行設計，數字獨立成行，入數字時唔使另按輔助鍵，撥號自然更得心應手。為照顧香港人，港版賣時鍵盤仲印滿倉頡碼，唔似其他手機要盲摸摸估字根，認真抵讚！

售價︰$2,580

原版底蓋玩簡約單色，相當討好。惟留意鏡頭只有300萬像素，唔多夠用！

Widgets任改大小

出到咁細實有東西少咗，冇錯，好似屏幕縮到得2.8吋，摩記自家Motoblur介面亦被抽起。但唔好以為細機就冇用，佢內建600MHz處理器加512MB RAM，已勝過唔少Smartphone。此外，電容式屏幕可玩到Multi-Touch，廠商更為此加入Moto Widgets，當中相片、日曆及便利貼等小工具，只要按實就能調校大小，加埋首頁有7版，真係幾多Widgets都放得落。不過新機鏡頭只有300萬像素，就算有Kodak Perfect Touch執相技術幫助，Snapshot都只係僅僅合格。