美國NBA一眾班主每年都會定期坐低一齊開會，最近一次嘅會議有位「特別嘉賓」出席，仲令到各球隊嘅班主大讚今次學到唔少添！呢位嘉賓唔係籃球專家，而係高盛行政總裁布蘭克費恩（Lloyd Blankfein），喺會上大談生意之道。
布蘭克費恩喺會上分享咗好多，例如佢對美國現時嘅經濟睇法，又「教路」海外投資及長線投資嘅重要性，呢位CEO當然唔會忘記分享管理好一間大公司嘅經驗啦，咁多嘢聽，難怪佢哋對布蘭克費恩讚不絕口。好似其中一位班主Wyc Grousbeck就形容，當布蘭克費恩分享嘅時候，在場每一位都「豎起耳仔」專心聽，大有塞錢入你袋嘅感覺。
原來布蘭克費恩並唔係首位喺NBA會議上「傳授」秘笈嘅華爾街人物，○九年摩根大通行政總裁戴蒙（Jamie Dimon）亦曾經同呢班球隊班主分享心得。
余詩韻