絲絲講場：夏佳理做保險業新丁

雖然夏佳理好老實咁話自己冇保險業相關經驗，預計呢份工會好有挑戰性，之但係佢就信心十足，話希望可以將自己過往喺唔同領域所累積嘅經驗帶去富衛。

任富衛董事會主席

夏佳理同絲絲講，佢嘅角色係制訂政策，以及研究海外唔同地方嘅監管要求。咁直頭係開正佢嗰瓣啦！夏佳理係金杜律師事務所嘅高級合夥人，呢間事務所喺國際間享負盛名o架，監管嘅問題點會難到佢呢？

新上任有冇咩發展大計？夏佳理就話自己啱啱就被委以主席重任，要了解吓公司股東有咩期望，而且要等董事會齊腳，先可以制訂一個共同目標。咁唔知會唔會幫公司搞上市呢？佢就話言之過早！

夏佳理一向多公職，依家佢就係國際財務報告準則基金會受託人，仲同時出任多項職務，當中包括西九文化區管理局董事會成員、香港藝術節主席、慈善機構香港社會創投慈善基金有限公司顧問委員會主席等等，睇嚟呢位大忙人又要重新分配時間啦！

余詩韻