期指觀瀾：港股大跌誘因不足
內地拆息抽升，新一輪錢荒抵銷了滙豐中國十月PMI初值升至50.9的利好消息。港股連跌三日，再瀉164點報22,835點，即月期指失守22,800點關口，日市收報22,794點，低水41點，成交8.8萬張。
前日大市急跌316點，以為已預視美股回吐，殊不知昨日沽壓比預期大，昨日期指早市見過22,960點高位後，淡友控制大局，低見22,738點，午後的反彈，曾經見過22,870點，顯見即市波幅0.618反彈阻力22,875點，起到一定作用。
見過鬼都怕黑，筆者過去一個月唔係未試過追勢博破位，結果恒指依然唔肯上破23,554點或者跌穿22,743點的大型上落區間，故索性建議實行守株待兔，等確認破位至算。前日恒指即市高位去到23,505點，無法逼近周初高位23,534點，更遑論23,554點，君可見兩日間回到昨日低位22,762點，若然誤判破位追勢，又要輸幾百點。
恒指收市價同中期上落區支持位22,743點，差距唔到一百點，今次會否有真突破？只能等時間畀大家答案。客觀睇，國際油價近日回落甚速，美債息因退市預期急降溫，回到2.5厘樓下，未見外圍有足夠令使港股調整的負面因素，結論係上落市可能仲未玩完。
John Mullen