內地最大嘅社交網站（以單一用戶瀏覽量計）人人網最快喺本周就會於美國上市，成為全球首家上市嘅社交網站，聽落係幾威，不過《福布斯》就唔係咁睇，佢哋話如果有朝一日Facebook（fb）真係與百度結盟，進軍內地嘅社交網絡市場，fb或者會砌低人人網。
《福布斯》嘅文章話，人人網喺首季嘅營收只有2,000萬美元，但公司手頭現金充足，上市後估值已高達43億美元。今日嘅人人網，就好似剛啱由哈佛大學裏面搬出嚟嘅fb一樣。就算贏咗fb，搶先成為全球首家上市嘅社交網站，人人網仍然只係一家市值好細嘅公司，與未掛牌嘅fb擺埋一齊，規模更加冇得比。
人人網嘅目標係發展成為內地社交網絡領域嘅百度，但依家盛傳fb與百度傾緊，合作喺內地推出fb服務，實行重返中國舞台，呢個超強組合隨時可以喺中國市場徹底擊敗人人網。
余絲韻