近日喺街上見多咗人揹住個Golf袋周圍走，絲絲覺得大多數打Golf嘅人都係非富則貴，有名你叫，Golf者，高而富也，莫非好似之前調查咁講，香港真係多咗有錢人？絲絲尋日撞到恒生（00011）私人銀行及信託服務主管陸庭龍（Alan），聽聞佢呢排都有練Golf，梗係要向佢請教吓啦。
Alan話佢之前都有打過Golf，不過就冇正式練習過。唔知係咪去年坐鎮私人銀行後，即刻要學吓啲有錢人運動呢？佢好坦白咁話，私銀客戶有好多都係城中富豪，佢哋特別鍾意打Golf，所以少不免要應酬，所以今年佢訂咗目標要練好Golf，仲坐言起行，喺農曆新年時請咗個教練，話希望短時間內可以Pick up。
傾吓傾吓，Alan話近年少咗運動，得閒會睇書Relax吓，最估唔到嘅係佢會寫吓文章，仲要係用原稿紙寫。絲絲聽完真係汗顏，因為自從中學畢業後都好少寫字，打字就打得多，真係唔寫個服字都唔得喇。
余絲韻