絲絲講場：米蘭站上市推介 ２００萬手袋壓場
女人天生係購物狂，最鍾意買高踭鞋及名牌手袋，二手名牌店米蘭站（01150）就食正呢條水，生意長做長有。米蘭站喺尋日舉行上市投資者推介會，當然有招牌貨名牌手袋坐鎮，其中有3個名牌手袋市值合共200萬元，吸引咗唔少投資者圍觀，現場仲有名模及明星江欣燕拎手袋出場影相，公司又大派印有「米蘭站」字眼嘅Cup cake，現場氣氛好似開Party咁開心。
現場嗰3個共值200萬元嘅名牌手袋，由一位身材魁梧嘅外籍保安員守護住，不過當有人埋身影相，保安員亦好識做行開畀大家任影。
米蘭站為咗令投資者對佢哋留下深刻印象，特別搵人製作咗200至300個Cup cake，上面印咗公司名，仲有個手袋仔，食得之餘亦好得意，絕對係誠意之作。
李文俊夫婦係fans
絲絲喺推介會現場見到理文造紙（02314）CEO李文俊，佢話做仁濟總理時認識咗米蘭店老闆姚君達，米蘭店上市佢當然要捧吓場，佢仲話會買番些少股份喎。問到佢老婆有冇幫襯米蘭店，李文俊就笑笑口話梗係有啦，兩公婆果然係呢間公司嘅粉絲。
余絲韻