環球經濟真係到處火頭，美國除咗開大水喉之外，就係將問題推卸晒畀中國，話大陸唔肯將人仔升值。我哋祖國都費事同你硬碰，好似人行行長周小川咁，就用咗唔同嘅比喻勸大家唔好心急，一時用「醫」，一時用「藥」嘅道理嚟撲火。
周小川喺上月人仔升值壓力最大嘅時候，就喺世界貨幣組織年會講到明話，人仔升值唔可以好似西醫咁落猛藥用「休克療法」，要好似中醫療咁循序漸進。上次講咗療法，佢尋日又「醫道」上身，用配藥解釋人仔升值唔急得。
佢嘅「中西醫」論都幾細緻，佢話中醫通常要用好多味藥劑配合，至可以達到總體目標，就好似中國依家嘅經濟狀況咁，匯率並唔係國家唯一嘅問題，大陸仲面對緊經濟結構轉變、減少對外部需求依賴、擴大內需、發展服務業等問題，呢啲症狀係要用多味「藥劑」先可以解決，唔係話用一味藥就可藥到病除。
除咗開藥唔同，佢又話中西藥另一個唔同嘅含義在於中醫有「試錯」及「動態調整」嘅做法，例如中醫會根據病人嘅反應及藥材嘅副作用，再調整用藥量及加減藥材，就好似大陸以前調整收支平衡嘅手段主要靠出口退稅，後來發現副作用多，所以就再做調整。
余絲韻