黑客入侵世界銀行！世銀尋日話有人用佢哋嘅名義發出電郵，呢個電郵涉及有關美國財政部部長蓋特納嘅言論，依家美國嘅經濟政策處於非常時期，有任何風吹草動，對全球影響都好大，尤其係官員言論，所以世銀即時澄清，叫人唔好上當，仲話呢個電郵有病毒。
事緣有人收到一個由「世銀」發出嘅電郵，內容係話「我哋正考慮我哋嘅立場，附上財政部長蓋特納嘅信件」，同時仲有世銀官員嘅簽名，收信者好奇，會唔會係講人民幣升值、全球經濟增長，抑或想表明自己嘅立場？最後收件者好醒目咁通知世銀，世銀即時澄清話並冇發出相關電郵，估計應該係有黑客入侵。
世銀強調，依家黑客入侵方式五花八門，佢哋已經盡力做好網上保安對抗黑客，又話近期有好多電郵詐騙案，呼籲大家亦要小心開電郵，特別係由銀行發出嘅電郵，就要特別留神。
余絲韻