大家覺唔覺尋日渣打（02888）員工有啲唔同呢？其實尋日係印度嘅排燈節（Diwali），對印度人嚟講，可以話係一年中最重要嘅節日，就好似香港嘅聖誕節咁，所以渣打尋日就提議啲同事，盡量穿着印度傳統服裝返工以響應慶祝節日。
渣打嘅亞洲區行政總裁白承睿本身係印度人，平時返工除咗着西裝，亦會跟番家鄉習俗包住個頭，咁今次印度服飾日咪啱晒佢？不過好可惜，絲絲知道佢唔喺香港，大家睇唔到佢着印度傳統服飾嘅風采。
除咗常駐香港嘅白承睿之外，渣打亦有好多印度裔嘅員工，佢哋當然樂於參與今次印度服飾日。唔單只咁，絲絲見到本地嘅員工即使一時間搵唔到印度服飾，都特登着得鮮艷啲一齊慶祝，可見員工之間係相當團結。
佢哋咁重視呢個印度節日係可以理解嘅。從渣打去年嘅業績睇到，印度市場嘅表現已經悄悄追上嚟，盈利貢獻僅次於香港，而喺今年嘅中期業績，印度就更已超越香港，成為集團盈利貢獻地區嘅No.1，可想而知印度市場對渣打有幾重要。
除咗排燈節之外，其實渣打經常會舉辦Happy Friday節目，令員工臨近周末時可以輕鬆吓，就好似之前嘅萬聖節，佢哋喺海洋公園搞咗個節目，畀員工與眾同樂慶祝一番，體驗工作與生活平衡。
余絲韻