絲絲講場：祈連活：掛鈎人仔有排等

尋日絲絲特登去港大做咗半日學生，唔單只絲絲咁神心，港交所(00388)兩位唔同年代嘅前行政總裁袁天凡及周文耀，以及港鐵(00066)主席錢果豐都一齊排排坐，乖乖咁坐喺台下「聽書」。

袁天凡周文耀等齊聽書

近期香港與好多新興國家及地區一樣，飽受熱錢流入將資產價格炒到癲嘅煎熬，香港最慘係冇得用利率呢種工具嚟壓抑通脹，於是乎又引發聯匯存廢嘅討論。

討論就梗係冇問題喇，但去到結論，祈連活就一定唔贊成脫鈎，佢話雖然美國與香港嘅經濟周期唔多一致，但香港嘅生意以美元結算為主，貨幣掛鈎令商家對港元信心大好多。至於與人民幣掛鈎又得唔得呢？佢話過多幾十年先講啦！咁精彩嘅分析，聽到在場逾200位聽眾拍晒手掌。

有人就問佢點睇美國推出第二輪量化寬鬆政策（QE2）對通脹嘅影響，佢好勞氣咁話，QE2唔會令通脹出現，好似日本咁，當低利率都搞唔起經濟時，日本政府都係用呢招，不過結果都係通縮。

祈連活對QE2嘅睇法準唔準，仲要時間證明，但佢有博士學位，講書咁認真，又有良好論據，第日如果唔做景順集團首席經濟師，唔知有冇興趣去大學教書呢？