推廣體育用品最好嘅方法，莫過於借助球星用自己品牌嘅產品，觀眾睇波時就可以收晒宣傳之效，好似內地體育用品一哥李寧（02331），就剛啱簽咗ＮＢＡ選秀大會嘅榜眼新星——埃文特納（Evan Turner）。
埃文特納今年喺選秀會上以榜眼身份被費城七十六人選中，佢讀大學嗰陣就為俄亥俄州立大學籃球隊征戰三個球季，平均得分二十五分、十一個籃板、五次助攻、三次封阻及三次搶截。
今次係李寧重塑品牌後，第一次與重量級運動員簽約，李寧全球創意中心將會為埃文特納定製專屬籃球裝備。埃文特納都好識做咁話，好開心得到李寧牌支持，相信李寧牌裝備可令佢發揮出最高水平。
李寧首席執行官張志勇話，埃文特納加入強化咗集團頂級世界級贊助資源嘅陣容，李寧亦係第一個與埃文特納呢位新星簽約嘅體育用品品牌。
余絲韻