全球排名晉升第6
AIA（香港及澳門）首席執行官陳榮聲就同絲絲講，話早前MDRT派咗成績表，AIA去年有超過600名業務代表入到MDRT，不但保持香港「冧巴溫」嘅地位，而且喺全亞洲保險公司排第四，全球排名更升上第六位。
聽落好似成績唔錯，但陳榮聲就話未夠，佢哋嘅發展目標係「MDRT 1000」，即係要有1,000名MDRT會員咁話。
其實絲絲聽人講，AIA都試過有逾1,000名MDRT嘅業務代表，所以要喺一年內多幾百名MDRT會員員工並唔係冇可能，但之前英國保誠嗰單世紀收購事件，唔多唔少對員工有啲影響，所以AIA要喺今年達到目標，睇嚟陳榮聲真係要加把勁喇！
余絲韻