早前聯想（00992）董事長柳傳志話蘋果公司嘅喬布斯唔太注重大陸市場，但其實睇番iPhone喺內地嘅受歡迎程度，睇嚟唔係好受影響，正如最新嘅iPhone 4一早已經話接收有問題，但仍然大把人搶住要。好似依家喺內地賣緊iPhone嘅聯通（00762）咁，尋日就有報道話，聯通副總經理李剛已帶隊飛去美國，與蘋果公司傾吓引入iPhone 4及iPad，報道仲話李總此行應該可以確定到時間表添。
那邊廂聯通飛去美國傾iPhone 4，另一智能手機品牌HTC（宏達）尋日就喺北京搞咗第一次嘅發布會，宣布進軍大陸市場，HTC董事長王雪紅及首席執行官周永明都有出席，HTC同時公布4款新機，其中兩款仲支援中移（00941）嘅TD-SCDMA。中移嘅終端部總經理吳唯寧尋日亦有出席發布會，佢話中移將與HTC通力合作，促進大陸移動通訊產業及移動互聯網業務嘅快速發展，而截至六月底，中移已累計賣咗600萬部TD手機。
余絲韻