規模有成3,000億美元嘅中國主權財富基金－－中國投資，尋日又再宣布喺全球開展新一輪嘅全球招聘活動，仲要一請就請成64個職位，主要都係從事資產配置、戰略研究部、收益投資部、策略投資部及私募投資部等，「截止報名」日期就係八月九日。
絲絲記得今次已經唔係中投第一次進行海外招聘，佢哋喺○七年成立之初都係面向全球招聘，其後喺○八年九月及○九年六月即全球金融危機爆發期間，又趁機吸納國際級人才。金融海嘯後，只係聽到金融機構炒人消息，中投招聘簡直係「及時雨」，吸引咗好多人申請。
依家市況好咗，反應會唔會好就冇咁早知，事關啲投行老友成日都話，中投個名係好吸引，但人工就麻麻哋，不過每次招聘仍有唔少人慕名而嚟，話晒都係中國嘅國家主權基金喎，喺度做過去邊度都多人請喇，呢啲經驗同機會唔係時時有。
美國最近修改法案，令聯儲局有權對金融控股公司行使監管權力，據講中投都研究緊新法案對佢哋嘅影響，皆因中投嘅子公司匯金依家係四大國有銀行嘅大股東，早前就有傳聞話中投及匯金會分家，以免影響中投喺美國嘅投資機會。剛啱加入中投旗下國際諮詢委員會嘅金管局前總裁任志剛及摩根士丹利董事長麥克，唔知喺呢方面有乜高見呢？
余絲韻