絲絲講場：敦沛出投資書賀20周年
尋日敦沛金融（00812）請絲絲食飯，先知道原來今年係敦沛嘅二十周年，為隆重其事，佢哋喺上月初就出版咗一本名為《投資投機─頭頭是道》嘅投資書籍，題材豐富之餘又夠廣泛，內容包括商品期貨、股票、基金、黃金、外匯及保險等，名副其實係包羅萬有。敦沛期貨行政總裁丁世民更親自執筆撰寫「商品期貨篇」嘅內容，將自己三十幾年來嘅投資期貨心得與讀者分享。
收益全捐慈善機構
向來低調嘅敦沛金融集團主席葉德華都出席午宴，對於公司呢本新書，佢就話：「市面上有啲投資書內容比較空泛，又容易過時，但我哋呢本就比較專業及深入，好適合大家去睇。」本書已出版咗啦，葉博士話會將呢本書嘅所有收益全數捐畀慈善機構，又會免費送書畀本地一啲學校嘅圖書館，希望學生哥可以增進一下投資知識喎。
余絲韻