唔少金融界從業員都想考番個特許財務分析師（ＣＦＡ）嘅頭銜，希望對前途有幫助，本月舉行嘅考試就有破紀錄嘅近十四萬人報名應考，其中來自中國及印度嘅考生增幅特別厲害。絲絲心諗梗係因為當地金融市場開始大事發展，所以愈來愈多人想拎番個專業資格，好似上海咁，話要喺二○二○年成為金融中心，冇番咁上下多嘅人才點做呀！
美國依然係最多人報考ＣＦＡ嘅國家，共有三萬八千人，較去年多咗百分之三；印度及中國呢兩大新興市場分別有逾一萬五千人及近一萬二千人報考，中國嘅報考人數增幅就輸咗畀印度，只增加一成九，而印度就大增三成九，唔知係咪因為印度人國際化程度高啲，對呢啲國際認證更為熱衷？抑或係語文方面好啲，所以多啲人去考呢？不過無論點都好，咁多人報名，有關方面一定賺到盆滿缽滿啦！
余絲韻