「創新、開明、先進」都係科技類型公司畀人嘅感覺，Google、蘋果公司嘅產品每每令到消費者趨之若鶩，不過近期美國《商業周刊》所搞嘅科技公司100強選舉，呢兩大科技巨擘竟然大熱倒灶，比亞迪（01211）力壓蘋果公司成為科企之王，騰訊（00700）得第3名，Google就二十大都不入。
呢個選舉首先將咁多間科技公司作篩選，少過10億美元市值、營業額少過5億美元、去年營業額同比跌幅多過5%、股價跌多過50%嘅公司，統統冇份入圍，然後就會將佢哋嘅收入及盈利調整，確保唔同公司都喺同一個基準之下比較，唔會太受規模影響，然後以收入及盈利各佔比35%、股東回報佔比20%，員工增長佔比10%而計算結果。
比亞迪能力壓蘋果公司成為科企之王，雖然佢哋為世人所認識唔係好耐，一向唔鍾意科網公司嘅「股神」巴菲特用咗2.3億美元入股10%後，比亞迪即時聲名大噪，之後股價長升長有，依家股神嗰筆投資以市值計已有20億美元，真係點石成金。咁厲害嘅股價升幅相信都幫比亞迪拎咗好多分，加埋公司仲喺起步階段，盈利增長一定可觀，但喺國際強手下都可突圍而出，係咪眾望所歸夠資格成為科技之王？咁就見仁見智喇。
余絲韻