市場熱線：滬杭甬防守力勝一籌

大象料再穿70元關

藍色大隻佬普遍下跌，美匯指數重返87高位，歐元重現弱勢，反彈或告一段落，需再向下尋底，思捷（00330）同告反彈完畢，股價跌5.5%，收報43.35元。不過，計劃將廠房搬至西部的富士康（02038），卻逆市升近3%，成為大隻佬升幅冠軍。口痕友話4G iPhone日內推出，估計富士康接單接到手軟，股價上月累跌兩成後，料可靠穩。

大笨象（00005）又險守70元大關，跌逾1%收報70.4元，古勝擔心其股價會再向下，皆因歐洲金融機構或出現新一輪撇帳潮，估計單係歐洲的錢莊，未來18個月需撇帳高達1,950億歐元。窮政府跟金融機構爭住融資，大笨象難免受拖累。祖國移動（00941）一度係好友捍衞指數的靈丹妙藥，可惜大市太過疲弱，祖移亦難獨善其身，股價散場跌0.8%，收報73.1元。

祖國何時推出房產稅，古勝烏卜卜，但香江昨日起執行「9招12式」售樓指引，一眾本地地主腳軟，跌幅介乎0.5%至2.2%之間。不過，在下又唔認為樓價調整會好深，皆因「通脹怪獸」威脅逼近，在目前的經濟情況，各國央行又未能輕言退市，在低息環境持續下，個個都買磚頭抗通脹，樓價難言大跌，尤以地點優越的豪宅，在買少見少的情況下，樓價只有高居不下。反而中小型單位，或在供應增加後，價格有所調整。紅色地主在房產稅陰影下，股價再度走軟，連帶紅色錢莊亦表現不濟，難怪國指又跑輸大市。

連四叔都話目前市況唔識睇，古勝早表示呢段時間有波幅，冇升幅，只有每況愈下，惟有選擇防守性較高的股份，才能抵抗反覆向下的市況。浙江滬杭甬（00576）係有番咁上下晒士的公路股，相信在跌市中可頂得幾吓頭槌。滬杭甬在派發首季業績後，「大魔頭」曾發吹水報告唱好，皆因其首季純利略高於市場預期。

息率達5厘夠吸引

滬杭甬自四月中起，以重量計算收費，新收費計劃相對鄰近省份的公路收費較為有利。上海世博開幕後，帶動華東地區的交通流量，亦會刺激集團旗下公路的使用量，今年盈利或有驚喜。滬杭甬另一吸引之處，係其年息率高達5厘，在目前的低息環境中，自能吸引好息之徒收集。

睇番公仔圖表，滬杭甬近日跌至6.5元反彈，昨日股價已重橫行密集區，暫未宜追入。可待股價跌穿7元分段買入，跌穿6.5元止蝕。

古勝