本文重點
金融海嘯之後，汽車市場復甦得最快，唔單止消費者鍾意買車，近排連銀行都送車催谷生意，建行亞洲及星展香港近日就同時推出送車優惠，分別送出Audi Q7轎車及寶馬3系房車，認真大手筆。
星展50萬定存抽寶馬
先講市值都成78萬元嘅Audi Q7，建行亞洲講明送畀外匯孖展客，仲唔使抽獎添，只要喺明年第一季前做夠14億美元外匯孖展就即刻送上。冇聽錯，係14億美元孖展，計番條數接近110億港元，真係收交易費用都收到手軟，唔怪得建行亞洲唔使搞抽獎更不設上限，送部咁貴嘅Audi Q7出去啦。
可以玩到成百億孖展嘅人始終唔多，而星展香港送寶馬3系雖然要抽獎，但係入場門檻唔算太高，每做50萬港元定期就有得玩，最多有10次抽獎機會，呢部寶馬320iA市值要成37.4萬元，最緊要係客戶唔使畀錢。
聽講近排銀行密密送車谷生意，真係開正高端客戶嗰瓣，因為金融海嘯後資產價格大反彈，唔少人身家水漲船高，買樓之後就係買車，因為感覺無咁易「接火棒」。
余絲韻