各界老友邀請搞展覽

光大老友話，今次唐總呢個書法展籌備咗都有成幾個月，係各界老友聯合邀請唐總搞，畀大家開吓眼界，唐總以前喺美國及日本都搞過書法展，反應唔錯，今次應邀一連三日嘅展出，係第一次喺香港搞，亦順便想答謝與光大合作咗好多年嘅各方老友。至於今次展出嘅幾十幅作品中，唐總個人最鍾意係張「山」字，佢無講係乜嘢原因，絲絲雖然係外行人，但覺得佢寫得好有氣勢，似係畫多啲。

喺個展覽度，絲絲又見到光大控股（00165）行政總裁陳爽笑笑口咁招呼朋友睇展覽，絲絲行過去問一向鍾意收藏字畫嘅陳總，有無收藏唐總嘅書法，佢話有，就係唐總送畀佢嘅「君子懷德」四個大字，證明咗唐總對佢一直以嚟喺光大表現嘅肯定，唔怪得陳總成日笑到口都合唔埋啦。

余絲韻