本文重點
能者多勞！滙豐李錦榮（Bruno）近來工作愈來愈多，大家上滙豐個網睇吓，就會見到佢親自主持嘅理財節目，好彩Bruno並唔係得個做字，好似佢卡片上嘅Title，保守估計都已經一年換3次。尋日絲絲接過佢嘅新卡片，至發現佢原來又升咗做亞太區個人理財業務財富管理業務區域主管，Bruno嘅同事快啲搵佢請食飯喇！
升任亞太區財管舵手
記得半年多前，Bruno仲係香港區個人理財業務部財富管理業務主管，到咗年初就睇埋存款管理，依家仲睇埋成個亞太區。
滙豐零售銀行啲職位名稱特別長，Bruno自己都笑稱個職銜太長，依家佢仍然會睇住存款嗰邊，因為財富管理包括投資、存款等幾個唔同範疇。
Bruno除咗頭先所講嘅做財富管理、出鏡教人投資外，今年真係好忙，例如有一次銀行公會例會，佢就上咗去同其他銀行代表簡報人民幣工作小組嘅進度，做完之後又見佢急急腳走，睇嚟應該係返公司做嘢，所以話努力係會有回報嘅。
余絲韻