呂慧儀「港太上身」自己都憎！

滕麗名、歐陽震華（Bobby）、呂慧儀及羅蘭等昨午到將軍澳一間小學，為劇集《一屋老友記》宣傳，席間與小學生大玩遊戲兼派腸粉，場面墟冚。該劇收視再報捷，錄得平均29點收視，最高為30點，一眾演員更因此人氣爆燈，可謂飲得杯落。

抽時間「造人」

呂慧儀演活「過氣模特兒阿花」角色，與阿滕經常鬥嘴，被指港女上身，她笑說：「我直情『港太』上身啦！角色唔討好，連我自己都憎自己。近日播出我凸腩嗰場戲，拍之前監製都問會唔會影響我嘅代言工作，我覺得劇情需要，不過最終我冇太多肉唧出嚟扮腩，導演唔係好收貨！」談到被拍得與老公逛街放閃，她說：「嗰日有屋企人睇住小朋友，我哋咪出去行吓，都要安撫吓佢（老公）嘛！（人氣急升，押後追仔大計？）唔好追仔，追女都得啩？我鍾意女。呢方面會抽時間，不過順其自然啦！」

在劇中有驚喜生鬼演出的「阿昭」徐榮，舉機與阿滕及學生自拍。	呂慧儀入晒屋，大受學生歡迎。	《一屋老友記》演員與多位學生於台上合照留念。

剃光頭都制

而阿滕被指為今年視后大熱，她直言感到壓力。對於不停被翻舊帳，她說：「最驚係睇番第一套電影《四個32A和一個香蕉少年》，嗰時啲頭髮畀人剪到得半吋。（依家得唔得？光頭呢？）OK嘅，會同老公講：『你未試過有光頭老婆，不如試吓。』（被翻情史？）唔介意，但唔好搞到人哋，都係講多啲我老公好啲。」至於多年來與Bobby「拍住上」，她說：「佢keep得幾好，好彩我冇整容啫！」稍後她將到北海道拍劇，並說：「所以過32點收視着泳衣，就靠晒其他拍檔喇！」Bobby則否認老婆有喜：「我哋兩公婆方向一樣，覺得二人世界最好，自由自在，不過收視好都值得恭喜我嘅！」

文﹕影視組