爛牙城抱抱傅嘉莉蝕底

無綫劇集《我瞞結婚了》藝員拉隊到西貢宣傳,低V「中門大開」的莊思敏不慎露乳貼;以熱褲示人的傅嘉莉則被洪永城所累,幾乎洩春光。

演員洪永城、黃翠如、黃浩然、傅嘉莉、陳煒、吳岱融及莊思敏等昨日到西貢為無綫劇集《我瞞結婚了》宣傳。莊思敏以低V裙「中門大開」亮相,用網撈魚時更不慎露乳貼。至於洪永城搞氣氛抱起穿熱褲的傅嘉莉拍照,令她險些走光。

滿口蛀牙礙觀瞻

洪永城被眼利網民發現在劇中滿口蛀牙,他說:「我都耿耿於懷,真係要搞搞佢,因為細個太鍾意食糖,其實嗰啲只係補牙嘅銀粉。之前拍《大帥哥》嗌,影到我好多爛牙,導演問我可唔可以合埋個口嗌。(女友唐詩詠介意嗎?)佢冇講過,但我好介意。(有冇臭味?)應該冇嘅,只係外觀唔靚啫。」黃翠如則爆洪永城有十多隻蛀牙,洪永城反駁:「邊有咁多?四、五隻啫!」

黃翠如男友蕭正楠昨日四十歲生日,她透露送了小禮物,前晚與曹永廉趁他《深宮計》放消夜送上生日蛋糕慶祝:「阿廉唔舒服都嚟,好好。蕭正楠今日要同馬浚偉拍通宵打戲,希望唔好受傷,佢年年生日都喺公司過,上年《幕後玩家》仲拍靈堂戲,今年已經好好,哈哈!」

黃浩然留鬚冇運行

至於莊思敏談到性感打扮時說:「係意外嚟,本來唔係着呢條裙,助手攞錯咗。(走光?)應該冇,有乳貼嘅,件衫應該好安全。(被寸件魚網衫可以撈魚?)我唔知要撈魚,錯有錯着,開工都成日互寸。」她又透露稍後劇中會有性感演出:「拍嗰陣監製話件衫太性感,最後要加件褸。」

黃浩然則自爆角色留鬚Look被妻兒嫌棄,他笑說:「我成日錫佢哋,啲鬚拮到佢哋,拍完第二日個仔就攞個鬚刨叫我剃鬚,老婆都話我留鬚冇運行。」

文:影視組