每當講到內地嘅寫真模特兒，總會令人聯想到火辣、性感同身材玲瓏浮凸，但係咪所有模特兒都要作極限性感演出，嚟吸引大家嘅目光呢？佩佩就證明畀大家睇，事實上唔一定要賣弄性感才獲得賞識之餘，仲可以盡顯個人美態。
出生於武漢嘅23歲佩佩，佢一直冇講點解入行做模特兒，但我哋可以旁敲側擊嚟尋找答案。作為一位湖北美女，佢繼承咗當地女性嘅堅韌、強悍、自信同任性，憑住先天優厚嘅條件，對於自己嘅外形同能力都充滿自信，咁做模特兒拍吓寫真，趁住青春留倩影都好合理。佩佩憑住出眾樣貌同迷人氣質，唔使走性感路線，足以令佢喺寫真界火速冒起。佢對於模特兒嘅工作，絕非抱持嬉戲心態，反而相當認真，由朝拍到晚，配合攝影師嘅要求，踎低攀高都在所不惜，試過因此而受傷，但佢忍住痛，堅持到拍攝完為止，咁專業嘅態度，實在抵讚。
大家亦可以喺各類型雜誌見到佢嘅身影，而佢又以車模身份喺車展中亮相，同時為各種商品拍攝平面廣告，最近佢就為婚紗公司進行廣告拍攝工作，真係忙個不停。
唔講唔知，原來佩佩係一位舞蹈教師，畢業於華中師範大學嘅佢，習得一身好舞藝，加上佢熱愛舞蹈，現時喺舞蹈學校中任教，佢經常喺個人微博分享授舞嘅樂趣及開心事，而佢自覺跳舞時嘅樣子最迷人。至於佢有幾愛跳舞呢？佢表示：「不跳舞，哪有青春。」直截了當講出佢對跳舞嘅熱愛與堅持。為咗可以圓佢追逐舞蹈嘅夢想，雖然佢要兼顧模特兒工作，仍然繼續練舞同授舞，如此堅毅嘅性格充分印證湖北姑娘嘅個性。
縱然佢努力不懈，仍然有覺得疲憊嘅日子，而喺呢個時候佢總會好好勉勵自己，正如佢所講：「不能辜負任何一個好天氣，不能錯過任何一個能夠帶給你笑容的人。工作狂朝七晚九的生活，甜蜜而充實，累並快樂着。」當然，如果有個堅實嘅膊頭作為避風港嘅話，咁就更加好啦！唔知經常喺微博上放閃嘅佢，係咪已經搵到呢個避風港呢？
簡介：縱然冇刻意賣弄性感，仍然掩蓋唔到佩佩嘅青春魅力，加埋佢自信嘅眼神，散發出獨有嘅韻味。如果想了解佢多啲，就要成為佢個人微博嘅追隨者，感受吓佢與別不同嘅魔力。
網址：http://www.weibo.com/u/2101134557?is_hot=1
出生地：武漢
身高：170cm
三圍：31、23、32
撰文：魂